Kirkjubæjarbúið er á höttunum eftir góðu tamningafólki. Framundan er fullt af skemmtilegum verkefnum. Leitum að fólki sem getur hafið störf sem fyrst, ýmsar útfærslur mögulegar. Áhugasamir geta sent póst á Þetta netfang er varið fyrir ruslrafpósti, þú þarft að hafa Javascript virkt til að skoða það eða hringt í síma 8986316.

Þá er síðasta hryssan köstuð þetta árið - það gerðist síðastliðna nótt en þá kom í heiminn flottur rauður hestur hjá Leistu undan Stormi frá Leirulæk. Þetta sumar var reyndar dálítið sumarið hennar Leistu því að hennar afkomendur héldu bara ágætlega haus þrátt fyrir allar hóstapestir. Dæturnar Lilja og Hrönn og dótturdóttirin Ísafold stóðu sig vel í sumar og héldu uppi merki Kirkjubæjar. Tíminn mun leiða í ljós hvort sá litli rauði nær að gera einhverjar svipaðar rósir.

Hestamót og kynbótasýningar hafa verið í lágmarki í sumar. Það er ekki auðvelt að sætta sig við það. Um síðustu helgi var þó heilmikið líf í hestamennskunni, stórar kynbótasýningar, gæðingakeppni og kappreiðar á Hellu og Vindheimamelum - gaman gaman!

Á Hellu kom meðal annarra fram í flokki 4. vetra kynbótahryssna Ísafold frá Kirkjubæ. Stórefnileg glanshryssa - fótaburður með albesta móti. Að henni standa heilmiklir garpar, Hrynjandi frá Hrepphólum, Glampi frá Vatnsleysu, Orri frá Þúfu, Þáttur frá Kirkjubæ og ekki má gleyma Ljúfi frá Hjaltabakka (Kirkjubæ) sem ævinlega hefur ýtt undir glæsta fótlyftu í afkomendum sínum.

Skoðið fleiri myndir hér neðar.

Þær höfðu ærna ástæðu til að vera kampakátar mæður í Kirkjubæ nú um síðustu helgi. Unnur var stolt af syni sínum Hjörvari en hann keppti til úrslita í ungmennaflokki á Stórmóti Geysis á Hellu og hafnaði í 5 sæti í hnífjafnri hörkukeppni á glæsihryssunni Lilju frá Kirkjubæ. Lilja gat líka verið stolt af dóttur sinni Ísafold sem kom fram í kynbótasýningu mótsins og stóð í fremstu röð í yngsta flokki hryssna. - hestagull báðar tvær Lilja og dóttirin Ísafold.