"Ég er búinn að eiga þennan draum í 30 ár" sagði Kári Fanndal þegar hann gekk frá kaupum á tveimur efnilegum hestum í Kirkjubæ á dögunum. Kári er nú eigandi að Þrym og Gissuri hvíta. "Við höfum trú á að hér hafir þú gert góð kaup" sagði Halldór Guðjónsson við sama tækifæri.

Eitt er víst að það mun gusta af Kára í vetur - faxprúðari hesta verður varla að finna í Viðidalnum!

Reynsla segir okkur að blesur, stjörnur, nasir, leistar og sokkar erfast misvel. Sumir hestar loka bókstaflega á þetta og eyða út - gefa bara einlitt. Við höfum lengi haft á þessu auga hér í Kirkjubæ enda hæg heimatökin. Ákveðnar hryssulínur hér gefa blesurnar skýrt og vel t.d. Leista okkar sem kemur af langri röð blesóttra hryssna hér á bæ. Litaerfðirnar eru ágætlega þekktar almennt þ.e. grunnlitirnir og helstu afbrigði þeirra sem stýrast af einföldum erfðum í gegnum nokkra þekkta erfðavísa. Um þessa hvítu flekki á höfði og fótum gegnir hins vegar öðru máli. Þeir stýrast greinilega af allnokkrum erfðavísum og í rauninni gætum við bara reiknað út sérstakt kynbótamat fyrir þennan þátt - gaman væri nú að koma því á koppinn fljótlega!

Það er gaman að taka myndir í vetrarríkinu þessa dagana. Hér er mynd af einni sem stefnir á að verða drottning - Eva frá Kirkjubæ - alsystir Fjólu frá Kirkjubæ á annan vetur!

Öðlingurinn Eldjárn frá Tjaldhólum er kominn á hús í Kirkjubæ. Hann hefur reyndar haft hér sitt fasta hryssuhólf í mörg sumur og auðvitað í þjálfun og keppni um árabil hjá Gumma og Evu. Til eru í Kirkjubæ 8 afkvæmi Eldjárns og þar af 7 á tamningaraldri og komin inn til tamningar og þjálfunar nú við áramót. Stjarna dóttir Fjólu er ári yngri og kemur því ekki fyrr en næsta vetur. Fyrstu kynni okkar af þessum tryppum eru góð. Sinnug og temjast vel. Við höfum séð svipaða takta og í þeim gamla, t.d. hjá Hafsteini og síðan er vekurð innanum eins og við höfum aðeins kynnst hjá hinum faxprúða Gissuri hvíta sem raunar er nú orðinn í eigu Kára Fanndal hestamanns í Víðidal. Verður gaman að fylgjast með þessum afkvæmum í vetur.