"Meistari er fæddur!" - Stapi frá Kirkjubæ

Okkar árlega og geysivinsæla folaldasýning var haldin á dögunum. Hún fer þannig fram að allar folaldshryssur er reknar heim og settar inn í stíur með afkvæmum sínum. Þá er gengið á röðina, örmerkt, ormahreinsað og hófar snyrtir á mæðrum eftir þörfum. Síðan er hryssu og folaldi, hverju pari á fætur öðru, hleypt út í stórt gerði og leyft að hlaupa þar í hringi að vild. Kirkjubæingar stilla sér upp meðfram gerðinu og skoða hreyfingar og annan þokka folaldanna á meðan einn eða jafnvel tveir hlaupa um gerðið, gjarnan á gúmmístigvélum, og reka parið til og frá. Síðan er rökrætt og jafnvel rifist um hvaða folald þyki best. Að þessu sinni var keppnin óvenju spennandi og flest ef ekki bara öll folöldin sérlega efnileg. Sigurvegari í flokki hryssna var Stjarna frá Kirkjubæ undan Eldjárni og Fjólu en reyndar aðeins sjónarmun á undan Strönd dóttur Storms og Hrannar sem spýttist um á svifmiklu brokki. Sigurvegari í flokki hesta, með yfirburðum, var hinsvegar Stapi undan Óm og Flugu. Eftir sýningu á Stapa höfðu Kirkjubæingar á orði og vitnuðu þar í Jón vin sinn heitinn á Vatnsleysu "Meistari er fæddur"

Best að fá sér soldið hey.

Allar folaldshryssur hafa að venju verið settar sér í svokallaða Skeifu þar sem byrjað er að gefa þeim heyrúllur. Þar verða þær fram yfir áramót svona eftir tíðinni en svo förum við að tína eina og eina úr, venja frá þeim og flytja á annan stað. Eins eru einhverjar sem eiga að koma inn til þjálfunar í vetur þ.á.m. klárhryssan Hrönn frá Kirkjubæ sem Eva ætlar að taka til framhaldsþjálfunar og sýningar í vor ef vel gengur. Hryssurnar líta allar vel út en þó þarf alltaf að hafa augun hjá sér með elstu hryssurnar að missa þær ekki niður.

Þetta var heillöng lest - þau rata leiðina, nóg að dóla á eftir í bíl.

Um síðustu helgi var stóðið rekið heim, öll hross ormahreinsuð og sprautuð við lús og annarri óværu. Hvert hross tekið og skoðað og hófar klipptir. Hrossin reyndust í mjög góðu standi, öll í góðum holdum og engir holdhnjúskar enda hefur tíðin verið góð og ennþá ágætur hagi. Síðan var stóðið rekið í vetrarhaga en ekki verður farið að gefa því alveg strax.

Feitir og fínir úr nýju girðingunni

Í sumar komum við Kirkjubæingar okkur upp nýju sumarhólfi fyrir ógelta hesta (og vonandi einhverja tilvonandi stóðhesta). Var hólfinu valinn staður þar sem hestarnir sjá engin önnur hross en nóg af grasi, vatni og skjóli. Hólfið reyndist frábærlega en slík aðstaða er auðvitað algjört þarfaþing á öllum hrossaræktarbúum. Fátt er leiðinlegra en öskrandi graðhestar heima við hús, allt sumarið hlaupandi meðfram girðingum, glithoraðir og þreytandi. Á dögunum voru hestarnir fluttir í vetrarhaga þar sem byrjað er að gefa þeim lystugar rúllur að vild. Þeir elstu koma síðan inn nú um jólin, Fáni og Þrymur á 5 vetur og Fróði á 4 vetur. Otkell á 4 vetur sonur Þórodds og Rebekku er þegar farin í tamningu og þjálfun til Halldórs og Helle í Dal.