Undanfarnar vikur hafa hryssur á fjórða vetur verið frumtamdar. Það verkefni hefur gengið afar vel og eru allar orðnar vel reiðfærar, óhræddar, sáttar og kunna orðið undirstöðuatriðin. Nú hefur þeim verið sleppt út á ný og stefnt er að því að taka einhverjar þeirra inn aftur um áramótin. Þær sem virðast fljótastar til eru tvær systur undan Hágangi frá Narfastöðum, önnur undan Lilju og hin undan Nös. Ákveðið að þær tvær amk komi inn aftur um áramót til frekari tamningar og skoðunar. Það er þó enginn asi á þessu hjá okkur, við sjáum bara til.

Hófapressan.is er hreint út sagt frábært apparat. Þar er hægt að hlaða inn myndskeiðum af hrossum rétt eins og á YouTube. Þar er reyndar fjöldinn allur af upptökum frá kynbótasýningum og af ýmsum hrossum við önnur tækifæri. Aðstandendur eiga heiður skilið - mjög lofsvert framtak!

Hér er til dæmis slóð á Fána frá Kirkjubæ 4. vetra frá vorsýningu á Hellu 2009.

http://www.hofapressan.is/watch_video.php?v=065ebd43aacf099

Lengi býr að fyrstu gerð - vanda þarf til frumtamninga

Þessa dagana er verið að frumtemja dágóðan hóp hrossa í Kirkjubæ. Um er að ræða ógelta hesta og hryssur á 4 vetur og geldinga sem fara á fimmta vetur. Þessi háttur hefur verið hafður á nú um nokkurra ára skeið að nýta haustið í þessi verk. Það hefur gefist vel enda hestar og menn í heppilegum gír á þessum árstíma.