Hróður verður fram eftir mánuðinum í nokkrum hryssum

Það hefur verið mikið að gera við að halda hryssum í Kirkjubæ á þessu sumri. Hér eru fjórir stóðhestar með hryssum auk nokkurra hryssna í fósturvísaflutningum í samstarfi við Dýralæknamiðstöðina á Hellu. Búið er að sóna hóp fenginna hryssna frá Hróðri Refsstöðum en hann verður hér á Kirkjubæ alveg fram á haust. Þá hefur verið sónað frá Eldjárn frá Tjaldhólum og Stormi frá Leirulæk og er útkoman mjög góð. Þrymur frá Kirkjubæ er kominn heim en hann var í hópi hryssna hjá Berglindi og Gunnari í Ey, ekki er vitað annað en það hafi gengið vel. Fáni frá Kirkjubæ gengur ennþá með nokkrum hryssum en reiknað er með að taka hann úr nú um miðjan mánuðinn.

Guðjón frá Kirkjubæ hugar að hestum, Gígjökull í baksýn

Einar bestu reiðgötur landsins eru um afrétti Rangæinga, Landmanna-, Rangárvalla- og Fljótshlíðarafrétti. Ekki nóg með að undirlagið sé gott heldur er útsýnið frábært, fjöll, vötn, ár og dalir. Nokkrir félagar af Rangárvöllum hafa farið í sérstaka síðsumarferð á hestum þessar leiðir nú sl. 25 ár. Nú var riðið sem leið liggur inn Fljótshlíð, inn að Einhyrningi, þaðan í Hvanngil um Hungurfit og niður hjá Keldum, alls þriggja daga ferð. Ferðin var farin í blíðskaparveðri nú í lok ágúst.

Dagur með þrjá til reiðar í hestaferð um Rangárvelli

Júlímánuður hefur liðið hratt, eiginlega allt of hratt, heyskapur - hryssum haldið - hestaferðir - ættarmót og tamningar. Frábært veður allan mánuðinn og eiginlega í allt sumar, menn vakna að morgni og það er alltaf sama blíðan. Heyskapur var tekinn með trukki í upphafi mánaðarins, mesta uppskera í manna minnum í Kirkjubæ, rétt um 700 rúllur af úrvalsheyi komnar í plast. Það ætti að duga og reyndar vel það næsta vetur. Þá léttu menn sér upp með stuttri en skemmtilegri hestaferð inn að Fossi, Rauðnefsstöðum og Þorleifsstöðum á dögunum. Þar eru líklega einar bestu og skemmtilegustu reiðgötur landsins - menn og hestar færast allir í aukana á fjaðrandi moldargötunum. Þá gerðu afkomendur og tengdabörn Sigurðar Haraldssonar frá Kirkjubæ sér glaðan dag og héldu ættarmót með pompi og prakt á Kirkjubæjarvöllum en hópurinn telur 89 manns - Sigurður hefði orðið 90 ára á þessu ári en hann lést árið 1998.

Hjörvar og Lilja í B-úrslitum fjórgangs

Frábæru Íslandsmóti yngri kynslóðarinnar lauk í gær á vallarsvæði Harðar í Mosfellsbæ. Ótrúlega góðir hestar og flottar sýningar. Hjörvar skellti sér með Lilju á mótið að sjálfsögðu og tók þátt í tölti og fjórgangi í ungmennaflokki. Þau stóðu sig vel á sínu fyrsta Íslandsmóti, komust í B-úrslit í báðum greinum og mega bara vel við una.