Stormur og Gummi í mikilli sveiflu!

Um síðustu helgi var haldið flott gæðingamót á Hellu. Þetta er í rauninni félagsmót hestamannafélagsins Geysis en nú orðið er mótið opið öllum. Þátttaka var góð, miklir snillingar skráðir til leiks. Að sjálfsögðu var tekið þátt í mótinu af fullum krafti frá Kirkjubæ og getum við vel við unað. Gummi og Stormur frá Leirulæk áttu stórsýningu og sigruðu A-flokkinn með einkunnina 9.16. Þá mætti Gummi með Eldjárn í B-flokkinn og stóð þar líka uppi sem sigurvegari með einkunnina 8.95. Helga Una og Hjörvar kepptu í ungmennaflokki og enduðu þar í 2 og 3ja sæti, með Karítas frá Kommu og Lilju frá Kirkjubæ, eftir æsispennandi úrslit þar sem 0.01 stig skildu þrjú efstu sætin. Það var mál manna að Geysismenn verði skeinuhættir á Landmóti að ári ef þetta er forsmekkurinn.

Oddi frá Kirkjubæ 3 vetra maí 2009

Nú þarf að grisja úr ógeltum folum og þá er yfirleitt úr vöndu að ráða. "Æ verða þetta nokkuð stóðhestar, eigum við ekki bara að drífa í þessu? Það væri nú gaman að sjá til - hver veit, það gæti tognað úr þessum! Hinn þarna sem stekkur þarna á undan - það er flott hreyfing í honum en andsk. er hann eitthvað lappastuttur......o.s.frv."

Það er amk búið að ákveða að láta þessa faxprúðu albræður halda sínu enn um sinn, báðir undan Eldjárn frá Tjaldhólum og Freistingu Flugudóttur frá Kirkjubæ.

Sólarhrings gamall u Óm frá Kvistum og Flugu

Folöldin koma hvert á fætur öðru í Kirkjubæ þessa dagana - skemmtilegur tími svo ekki sé fastar að orði kveðið! Þeir eru háfættir og þroskaðir folarnir undan Óm frá Kvistum annar rauðstjörnóttur og hinn bleikblesóttur sem kom í gær. Þá eru komnar þrjár hryssur undan Hróðri frá Refsstöðum, Markúsi frá Langholtsparti og Má frá Feti.

Gummi og Eldjárn á góðri stund

Hvítasunnumót Fáksmanna var haldið nú um helgina. Mótið var vel sótt og öflugt enda mikið úrval snjallra gæðinga skráð til leiks. Gummi mætti til keppni með Eldjárn frá Tjaldhólum og stóð uppi sem sigurvegari í B-Flokki með einkunnina 8,88. Athygli vakti að Eldjárn hlaut hæstu einkunn fyrir öll atriði. Gummi tók einnig þátt í A flokki með Ás frá Hafliða Ármótsbónda og endaði þar í öðru sæti á eftir góðhestinum Stakk frá Halldórsstöðum. Ágætis helgaruppskera þetta!